Photo on TN Places

Thursday, April 17, 2014

மத்திய சென்னை வாக்காளர்களுக்கு ஒரு வேண்டுகோள்!



மத்திய சென்னை வாக்காளர்களுக்கு ஒரு வேண்டுகோள்!


மத்திய சென்னை பாராளுமன்ற தொகுதியானது - அண்ணா நகர், துறைமுகம், ஆயிரம் விளக்கு, வில்லிவாக்கம், எழும்பூர், சேப்பாக்கம் மற்றும் திருவல்லிக்கேணி என்கின்ற சென்னையின் சில முக்கியமான பகுதிகளை கொண்ட ஒரு தொகுதி.  ஏறத்தாழ 12 லட்சம் வாக்காளர்களாகிய நீங்கள் சென்றமுறை  நாடாளுமன்றத்தில் உங்களையும், உங்கள் உணர்வுகளையும் எழுப்ப தகுதியானவர் என்று திரு. தயாநிதி மாறன் அவர்களை தேர்ந்தெடுத்து அனுப்பினீர்கள்.

சென்றமுறையும்,  அவர் தாத்தாவும், மாமாவும் உங்களிடம் ஆதரவு கேட்டனர். "அவர் ஆங்கிலம் நன்றாக பேசுவார்" என்பதினாலேயே அவரை டில்லியில் குடும்ப பிரதிநிதியாக அனுப்ப உங்கள் வோட்டுக்களை உபயோகப்படுத்தினர். அவர் நாடாளுமன்றத்தில் விவாதித்த நாட்களோ அல்லது உங்களுக்காக குரல் கொடுத்த நாட்களோ மிக சொற்பம். குடும்ப பிரச்சனைக்காக அவர் வேலை அதிகமாக செய்ததாகவே தெரிகின்றது.  இதன் முத்தாய்ப்பாக, தனது சகோதரர் கொம்பனிக்கான தொலைபேசி, இவர் மந்திரி பதவியை உபயோகப்படுத்தி இலவசமாகவே உபயோகித்ததும், இந்த ஊழல் வெளியே தெரிந்ததும், பதவி விலகியதும் நாம் அனைவரும் அறிந்ததே.

உங்கள் பகுதியை, உங்கள் பகுதியின் இன்றைய நிலை, கடந்த 5 ஆண்டுகளில் என்ன மாறுதல்கள் ஏற்பட்டுள்ளன என்பதை கொஞ்சம் சுற்றி பாருங்கள்! மணம் மாறா சாக்கடைகள்,
இன்னமும் அதிகரித்துள்ள குப்பை மேடுகள், அவற்றின் நடுவே வாழ்க்கைக்கு போராடிக்-கொண்டுள்ள நமது ஏழை மக்கள்,
குறுகிய சாலைகளில் அதிகமாகிவரும் பாதுகாப்பில்லா வாகன ஓட்டம், குறுகிய சந்துகளின் மத்தியிலும் பெருகிவரும் மக்கள் தொகை, அதற்க்கு கொஞ்சமும் ஈடு கொடுக்க இயலாத வசதிகள்,
ஒவ்வொரு மழைகாலத்திலும் வெள்ளமாக மாறும், கோடையில் வெப்பத்திற்கு ஒதுங்க நிழல்கூட இல்லாத சாலைகள்,
எங்கும் முளைத்துள்ள செல்போன் டவர்கள்,
பாதசாரிகளுக்கு லாயக்கில்லாத சாலைகளில்,
சொகுசாய் பயணிக்க ஆகாய ரெயில்களின் வேலை மாத்திரம் ஜரூராக நடக்கின்றது ஆனால் கொசுக்களை ஒளிக்க எந்த அரசாங்கத்திற்கும் அக்கறை இல்லை,
பெருகிவரும் மக்கள் உடல்நல இன்னல்கள், அதை வலியுறுத்தும் விதத்தில் தெருவிற்கு 4 மருத்துவமனைகள், 8 மருந்து கடைகள்,
இவற்றின் பிடியிலிருந்து தப்பியவருக்கு தவறாமல் தெருவிற்கு பல TASMACக்குகள்.

இதுல இவர் என்ன செய்தார்?

இவர் உங்களுக்காக குரல் கொடுக்கவில்லை என்றால், சரி, பாவம் அவர் வசிக்கும் சொகுசு மாளிகை உங்கள் பகுதியில் இல்லை அதனால் தெரியவில்லை. உங்கள் உணர்வுகளுக்காகவாவது எப்போதானும் குரல் கொடுத்தாரா என்று பார்த்தால், அதுவும் இல்லை. இலங்கை தமிழர் படுகொலை, தமிழக மீனவர்களின் மேல் தாக்குதல், தமிழகத்திற்கான தண்ணீர் பிரச்சனை, கூடங்குளம், இப்படி தமிழகத்தில் நாம் எல்லாரும் பலமுறை ஆராய்ந்து, பேசிய பல விஷயங்கள்...நம்ம வாழ்க்கையின் மத்தியில் நாம் time passக்கு பஸ் ஸ்டாண்டில் பேசுற சினிமா கிசுகிசு நேரம் கூட இந்த மனுஷன் தமிழர்க்கு தேவையான விஷயங்களை நாடாளுமன்றத்தில் பேச முயற்சி பண்ணலை.

வெட்கம்கெட்டு, அதே மனிதர் இன்று மீண்டும் உங்கள் வோட்டுக்களை அவர் குடும்ப நலத்திற்கு வேலை செய்வதற்காக உபயோகித்துக் கொள்ளவே உங்களை  நாடி வந்துள்ளார். அவர் தாத்தாவும், இந்த முறை என்ன சொல்லி  வோட்டு கேட்பது என்று அறியாது, "அவன் சுட்டி, மான் குட்டி,..." என்று ஏதோ திரைப்பட பாடல் எழுதுவதாக எண்ணிக்கொண்டு உங்களுக்கு பிட் நோட்டிசை அனுப்பியுள்ளார். அவருக்கே அதுக்கு மேலே எழுத ஒன்னும் வரல்ல. ரேகார்டுல பாட்டு போட்டு, காசுக்கு ஆட்கள போட்டு, பொம்மைய அவரை வண்டியில் நிக்க வெச்சு, உங்களோட வோட்டை காசுக்கு வாங்கறதா நினைச்சு, ஜனநாயகத்தை அவமானபடுத்தும் இந்த மனிதரை நீங்கள் மீண்டும் வோட்டு போட்டு அவர் குடும்ப தொழிலை உங்கள் செலவில் பார்க்க அனுப்ப போகிறீர்களா?

கொஞ்சம் யோசியுங்கள்.

சென்னையின் பல பழமையான பகுதிகளை சேர்ந்தவர்கள் நீங்கள். ஒவ்வொரு வருடமும் சென்னையில் நடக்கும் பல முக்கிய திருவிழாக்கள் உங்கள் பகுதியில் தான் நிகழ்கின்றது. பல மதத்தை சேர்ந்தவர்கள், மொழி மற்றும் இந்தியாவின் பல பகுதியை சேர்ந்தவர்களும் சேர்ந்து ஒற்றுமையாக, காலகாலமாக இருந்துவருவது இந்த சென்னை நகரை, இந்தியாவின் மிக அமைதியான நகரமாக தொடர்ந்து நிலைநாட்டி  வருகிறது.

இன்று இந்தியா எதிர் கொண்டிருக்கும் முக்கியமான சவால்  - அமைதியை சார்ந்தது. "இந்த நாடு அமைதியான, மத நல்லிணக்கத்தை பேணிகாக்கும் நாடாக தொடருமா?" என்னும் கேள்வியை உலகமே கேட்டு மிக ஆர்வத்துடன் நோக்கும் கால கட்டத்தில் இப்போது நமது தேர்தல் நடக்கின்றது.

தொடர்ந்து உங்கள் பழைய நாடாளுமன்ற உறுப்பினரை போல் பல ஊழல்வாதிகளை அடைகாத்து, முன்னிறுத்தி, வெட்கம் கெட்டு, ஒளிய இடமில்லாமல் தவிக்கும் காங்கிரஸ் ஒரு பக்கம்,  'யாரோடு கூட்டு இருந்தாலும் இல்லாவிட்டாலும் எங்கள் குடும்ப தொழில் தொடரும்' என்று தொடரும் கழகம் மறுபக்கம், இந்த கழகத்திலிருந்து முளைத்த பல கிளை கழகங்களும் அவற்றை ஆளும் சந்தர்ப்பவாதிகளும் இன்னொரு பக்கம், அமைதியை குலைக்கும் மிகபெரிய சக்தியாக உருவாக வாய்ப்பிருக்கும் ப.ஜ.க. மற்றொரு பக்கம் என்று பல முனை போட்டியாக ஒரே விதமான அரசியல் கலாசாரத்தில் முளைத்தவர்கள் உங்களை நாடி வாக்கு கேட்டு வந்து கொண்டிருக்கிறார்கள்.

அமைதியாக இவர்களின் மத்தியில் ஒரு மனிதர், 200 க்கும் மேற்பட்ட கி. மி. உங்கள் பகுதியில் மாத்திரம் கடந்த ஒரு மாதமாக நடந்தே, உங்களில் ஏறத்தாழா 40000 பேருக்கு வணக்கம் கூறியும், கைகுலுக்கியும் வருகின்றார். "இவரை பார்த்தல் அரசியல்வாதி மாதிரி இல்லியே?" என்று குழம்பி பார்ப்பவர்க்கு இவர் மிக எளிதாக, "இல்லை, நான் அரசியல் வாதி இல்லை. நான் உங்களை போல் ஒரு சாமானியன், உங்களில் ஒருவன். நான் அரசியலுக்கு சம்பாதிக்க வரவில்லை, உங்களின் கஷ்டங்களையும், உங்களின் உணர்வுகளையும் நாடாளுமன்றத்தில் சேர்ப்பதே என் வேலை" என்று கூறுகின்றார்.

மற்ற வேட்பாளர்களை சுற்றி கூலிக்கு வேலைசெய்யும் அடியவர் கூட்டம், இவரை சுற்றி மாத்திரம் இளைஞர் கூட்டம், எல்லோரும் படித்தவர்களாக தெரிகின்றனர், பண்போடு பழகுகின்றனர், சிரித்து வாக்கு கோருகின்றனர், இவர்களது அரசியல் கலாசாரமே மிகவும் ஒழுக்கமாகவும், வியப்பில் ஆழ்த்த வல்லதாகவும் உள்ளது.

யார் இவர்கள்?

இந்திய அரசியலில் வானில் மாற்றத்தை உருவாக்க புறப்பட்டுள்ள ஒரு புதிய சிகரம் தான் இவர்களை  இணைத்துள்ள "ஆம் ஆத்மி கட்சி", அதாவாது எளிய மக்கள் கட்சி.

 யார் இந்த விந்தை மனிதர்?

 ஜே.பி. என்று எல்லாராலும் மரியாதையுடனும் அன்புடனும் அழைக்கப்படும் இந்த அமைதியான மனிதர், அன்றாடம் நாம் காணும் காட்சிகளின் கலைநயத்தை ஓவியம் மூலம் நமக்கு எடுத்து காட்டவல்ல ஒரு அருமை ஓவிய கலைஞர். முப்பதாண்டுகளுக்கும் மேலாக தன்னார்வு தொண்டர்களை தேடி, கண்டுபிடித்து, அவர்களுடன் தானும் வேலைசெய்து, அவர்களது செயல்களை பகிர்வதன் மூலமாகவும், அவர்களின் நேசமிகு சங்கமத்தில் தன சுகத்தை கண்டுவரும் ஒரு உன்னத மனிதர். சாதாரண மக்களின் துயரங்களை தினம் தினம் கண்டு, அதனை போக்க தன்னால் முடிந்த முயற்சிகளை மேற்கொண்டு யாரையும் எதிர் பார்க்காமல் தொடர்ந்து பணிசெய்யும், விவேகனந்தர் வழி வரும் ஒரு கர்ம வீரர். எல்லாவற்றிற்கும் மேலாக நேர்மையாக தன குடும்ப கடைமைகளை ஆற்றிவரும் ஒரு சாமானிய இந்தியர்.

என்றேனும் இந்த நாடு எளிய மக்களுக்காக இயங்காதா? இங்குள்ள அரசியல் மாறாதா? என்று அங்கலாய்க்கும் கோடிக்கணக்கான மக்களுக்கு, இன்று, "நான் அதற்க்கு தயாராக இருக்கிறேன்", என்று உங்கள் பகுதியிலேயே வசித்துவரும் திரு. ஜே. பி. அவர்கள் முன்வந்துள்ளார்.

அமைதிக்கும், ஊழலற்ற மாற்று அரசியலுக்கும் தேசிய அளவில் ஒரு மாற்றத்தையும், உலகளவில் ஒரு நம்பிக்கையும் ஏற்படுத்தும் வலிமை இன்று நீங்கள் ஒவ்வொருவரும் செலுத்தும் வாக்கிற்கு உள்ளது. இந்த வரலாற்று சிறப்பு மிக்க வாய்ப்பு நமது வாழ்வில் நிகழ்வது நமக்கு பெருமை, உங்கள் வாக்குகளை திரு. ஜே. பி.க்கு அளிப்பதின் மூலம், இந்த தேசத்திற்கும் உலகிற்கும், நீங்கள் ஒரு வலுவான,  அமைதியான செய்தியை தருகிறீர்கள்.

இந்த வேண்டுகோளை இவ்வளவு தூறும் படித்திருந்தால் நன்றி, நிச்சியமாக வாக்களிக்க தவறாதீர்கள். தீயவர்கள் திளைக்க, நல்லவர்கள் ஒன்றும் செய்யாமல் இருப்பதே முக்கிய காரணம் என்னும் காந்தியின் சொற்களை இந்த தருணத்தில் நினைவில் கொள்ளுங்கள். 



நன்றி.

Thursday, February 13, 2014

தமிழக பருத்தி உற்பத்தி - உண்மை நிலை என்ன?

தமிழக பருத்தி உற்பத்தி - உண்மை நிலை என்ன?

நேற்று தமிழக சட்டசபையில், நிதியமைச்சர் திரு. ஓ.. பன்னீர்செல்வம், தேர்தலுக்கு முன்னதாக ஒரு நிதிநிலை அறிக்கையை தாக்கல் செய்தார். இதில் மிக முக்கியமாக அவர் தமிழக பருத்தி உற்பத்தி உயர்வதற்கான முயற்ச்சிகள் மேற்கொள்ள இருப்பதாகவும், தற்போதய 3.34 லட்சம் ஹெக்டர் நிலபரப்பில் உள்ள பருத்தி உற்பத்தி வரும் ஆண்டு 3.7 லட்சம் ஹெக்டர் வரை உயரும் என்றும், இது மேலும் வரும் 5 ஆண்டுகளில் 6 லட்சம் ஹெக்டர் ஆகும், என்றும் தெரிவித்துள்ளார். (செய்தி 1, 2, 3).

ஆனால், கடந்த ஆண்டு, இதே சட்டசபையில் தாக்கல் செய்யப்பட்ட வேளாண் அறிக்கையில், தமிழக பருத்தி உற்பத்தி வெறும் 1.55 லட்சம் ஹெக்டர் அளவுதான் என்று நிர்ணயிக்கப்பட்டு அறிவிக்கப்பட்டுள்ளது (தமிழக வேளாண் துறை அறிக்கை, 2013-14 இங்கு சொடுக்கவும்). அதற்க்கு பிறகு, இந்த ஆண்டு ஜனவரி வரை நடந்த கொள்முதலும் இந்த அளவிற்கு ஏற்றதாகவே உள்ளதாக தேசிய அளவில் பருத்தி உற்பத்தியை கண்காணிக்கும் நிறுவனமும் தெரிவிக்கின்றது (இங்கு சொடுக்கவும்).

தமிழகத்தில் பருத்தி உற்பத்தியின் உண்மை நிலை என்ன?

எவ்வளவு நிலபரப்பில் பருருதி உற்பத்தி செய்யப்பட்டு வருகின்றது?

திரு. பன்னீர்செல்வம் சட்டசபையில் தெரிவித்த நிலைமை ஏன் கடந்த ஆண்டு வேளாண்மை அமைச்சர் தெரிவித்த எண்ணுக்கு முரணாக உள்ளது?

 உண்மை என்ன?
ஏன் இந்த அவசர அறிவிப்பு?

 1.55 லட்சம் ஹெக்டருக்கே எட்டிபிடிக்க தமிழகம் தடுமாறும் போது, இந்தவருடம் தமிழகம் முழுவதும் மழை நிலைமை மோசமாகவும் இருக்கும் நிலையில், நீர் உறிஞ்சும் பீடி பருத்தி, நாடு முழுவதும் பரவலாக விவசாயிகள் மத்தியில் அதிருப்தியை ஏற்படுத்தி உள்ள இன்றைய நிலையில், இந்த "பருத்தி" திட்டம் இவ்வளவு முக்கியமாக அறிவிக்க காரணம் என்ன?

Sunday, December 15, 2013

உலகமயமாக்கலின் 'உபயத்தால்' நம் நாட்டவர்கள் ஒருவரை ஒருவர் மாய்த்துகொள்ள தூண்டும் ஒரு கொள்ளை...

சிவப்புச்சந்தன மரம்...உலகமயமாக்கலின் 'உபயத்தால்' நம் நாட்டவர்கள் ஒருவரை ஒருவர் மாய்த்துகொள்ள தூண்டும் ஒரு கொள்ளையின் கதை!

சென்னை, மார்கழி 1, 2013: சிவப்பு சந்தன மரத்தை கடத்திகொண்டிருந்த கடத்தல் காரர்கள் சிலர், ஆந்திர மாநிலத்தின் வன அலுவலர்கள் இருவரை கொலை செய்துள்ளதாகவும், மற்றொருவரை பயங்கர ஆயுதங்களை கொண்டு தாக்கியதாகவும் செய்திகள் வெளியாகியுள்ளன. ஆந்திர மாநில முதல்வர், இந்த கொலை செய்தவர்களை கண்டுபிடிக்க உத்தரவிட்டு தனிப்படை அமைத்துள்ளதாகவும் செய்திகள் வெளியாகியுள்ளன.

தமிழகத்தின் வடக்கு மாவட்டங்களிலும், திருப்பதி கோயில் அமைந்துள்ள (pterocarpus santlinus) என்கின்ற மரம் வளர்ந்துவந்தது.
சேஷாசலம் மலை தொடர்ச்சியிலும், மற்றும் இலங்கை, பாகிஸ்தான், நேபாளம், சீனாவின் சில இடங்களிலும் மாத்திரமே சிவப்பு சந்தனம் என்று தமிழகத்தில் அழைக்கப்படும், red sanders

சந்தன வேங்கை அல்லது சிவப்பு சந்தன மரம்
இப்போது பல இடங்களிலும் அழிந்துவிட்ட படியால், இந்த மரம் வெறும் ஆந்திரமாநிலத்தில் திருப்பதியை சுற்றியுள்ள மலை பிரதேசங்களில் மாத்திரமே பெரும்பாலும் உள்ளது. ரக்த சந்தனம் என்று தெலுங்கிலும், மலையாளத்திலும் அழைக்கப்படும் இந்த மரம், ஆயுர்வேத மருந்தில் பரவலாக உபயோகப்படுத்த படுகிறது. முகத்தழகு, மற்றும் முகப்பரு அகற்றுவதற்கும், உடலை குளுமையாக வைத்திருக்கவும், இந்த மரத்தின் பட்டை மற்றும் கிளை பலவடிவங்களில் உபயோகிக்கபடுவதாக சில கட்டுரைகள் தெரிவிக்கின்றன.

முக்கியமாக இந்த சிவப்பு சந்தன  கட்டையை கொண்டு பலவிதமான கைவிஞை பொருட்களை தயாரித்து வந்தவர்கள் சீனர்கள். அவர்கள் நாட்டில் 200 வருடங்களுக்கு மேலாக, இந்த மரத்தினால் செய்யப்பட்ட மேஜை, நாற்காலி, பெட்டி போன்ற பொருட்களை அரசர்கள் குடும்பம் மாத்திரமே உபயோகித்து வந்தது. சீன மொழியில், "சிடான்" என்று அழைக்கப்பட்டுவரும் இந்த மரத்தை அரச மரம் என்று கூட அவர்கள் கூறி இந்தமரதால் ஆனா பொருட்களை, மிகப்பெரிய அளவில் மதித்து வந்தார்கள்.  இன்றும் கூட சீனாவில் சிடான் மரத்தால் ஆனா பொருட்கள், 300 முதல் 3000 டாலர்கள் வரை விற்கப்படுகின்றன.

மற்ற இடங்களில் மறைந்து விட்ட இந்த மரத்தை தற்போது, தேடி தேடி சீனர்கள் கடத்தி கொண்டுள்ளார்கள். இப்போது இந்த மரம் ஆந்திர தமிழக எல்லையில் உள்ள திருப்தி மலைத்தொடர் களில் உள்ள கடப்பா  மற்றும் சித்தூர் சிறு நகரங்களை ஒட்டி உள்ள வனப்பகுதியில் மிக அதிகமாக உள்ளது (உலகத்தில் வேறு எங்கும் இந்த மரம் இல்லை என்றே கூட சில ஆவணங்கள் தெரிவிக்கின்றன). இங்குதான் இந்த கடத்தல் கடந்த சில மாதங்களாக நிகழ்ந்தவண்ணம் உள்ளத்து.  ஏறத்தாழ 8 அடி உயரம் வரை முழுமையாக வளரக்கூடிய இந்த மரம், மிகவும் அடர்த்தியான ஒரு மரமாக கருதப்படுகின்றது, நீரில் மூழ்கக்கூடிய இந்த மரம், மிகவும் எளிதில் வளரக்கூடியதில்லை,  முழு வளர்ச்சிக்கு, இந்த மரம் 300 வருடங்கள் தாக்கு பிடிக்கவேண்டும். இதனாலேயே, மருத்துவ குணம் கொண்ட இந்த மரத்தை நமது நாட்டின் 'பாதுகாக்கவேண்டிய மூலிகை' என்கிற பட்டியலில் சேர்க்கப்பட்டுள்ளது.

சீன தேசத்தார் ஏன் இந்த அளவிற்கு இந்த சிவப்பு சந்தனமர கடத்தலில் ஈடுபட்டுள்ளனர்? திருப்பதியில் வனப்பகுதியில் கடத்தப்பட இருந்த, மீட்கப்பட்ட, சிவப்பு சந்தன மரத்திற்கு 1000 கிலோவிற்கு 50 லட்சம் ருபாய் கொடுத்து சீன வியாபாரி ஒருவர் வாங்கிக்கொள்ள தயாராய் இருப்பதாகவும், இதற்காக அவர் தங்களை அணுகியதாகவும், வனத்துறை அதிகாரிகளே தெரிவித்துள்ளனர். சீன சந்தையில், 1000 கிலோவிற்கு 2 கோடி  வரை விலை கொடுத்து வாங்க மக்கள் தயாராய்  இருப்பதாக ஒரு செய்தி தெரிவிக்கின்றது.

இதன் உண்மை நோக்கம் வெறும் அழகு பொருட்களோ அல்லது மருந்துக்கோ அல்ல, ஆனால், இதை கொண்டு சீன அரசாங்கம், வேறு ஏதோ தயாரிக்கின்றதாக யூகித்து நமது வனத்துறை அதிகாரி ஒருவர் சில காலத்திற்கு முன்னர் ஒரு பேட்டியில்  தெரிவித்திருந்தார். உண்மையில் இது அணு உலை மற்றும் அணுசக்தி துறையில் எந்த விதமான உபயோகம் இருந்தால், இந்த கடத்தலை, 'தேசிய பாதுகாப்பு' என்ற பெயரில் நாம் பாதுகாக்க வேண்டும். 
நன்றி, ஹிந்து நாளிதழ் 

கடந்த சில மாதங்களாக, இந்தியாவின் பல மாநிலங்களிலும் சீன நாட்டவர்கள் சிறு சிறு மறக்கடைகலாகவும், பெரிய அளவிலும் கூட, இந்த மரத்தை விமானம் மூலம் கடத்தி கொண்டு செல்ல முயற்சித்த போது, பிடிபட்டுள்ளனர்.

ஜூன் மாதம், மும்பையில் 370  கிலோ சிவப்பு சந்தன  மரக்கட்டை சில சீன பிரயாணிகள் கடத்த முயற்ச்சித்த போது, விமான நிலையத்தில் பிடிபட்டனர்.

ஜூலை மாதம்,  ஹைதராபாதில் 4000 கிலோ, விமான நிலையத்தின் அருகில் இருந்த ஒரு கிடங்கில் இருந்து கைப்பற்ற பட்டதாக செய்திகள் தெரிவிக்கின்றன. அதே மாதத்தில், டில்லியில் சீன நாட்டவர் சிலர், 700 கிலோ, சிவப்பு சந்தன கட்டைகளை தங்கள் பைகளில் மறைத்து எடுத்து செல்ல முயற்சித்த போது, விமான நிலையத்தில் கைதாகினர்.

செப்டெம்பர் மாதம், கேரளாவில் 1450 கிலோ சிவப்பு சந்தன கட்டைகள் பரிமுதலாயின, இவை குஜராத்திலிருந்து முன்ற துறைமுகம் வழியாக சீனாவிற்கு அனுப்புவதற்காக கிடங்கியில் வைக்கபட்டிருந்தன.

அக்டோபர் மாதம், சித்தூரில் 15 லட்சம் பெறுமானமுள்ள கட்டைகள் பரிமுதலாகியதாக செய்திகள் வந்தன.

நவம்பர் மாதம், 3 சீனர்கள் கொச்சி விமான நிலையத்தின் வாயிலாக 80 கிலோ சிவப்பு சந்தன கட்டைகளையும், சென்னையில் 2 சீனர்கள் 27 கிலோ சிவப்பு சந்தன கட்டைகளையும் கடத்த முயர்ச்சிததனர், அல்லது முயற்ச்சியில் பிடிபட்டனர். பிடிபடாமல் எவ்வளவு பேர் தப்பித்து சென்றுள்ளார்கள் என்று நாம் வேறு கணக்கு இட வேண்டியுள்ளது.

டிசம்பர் (இந்த மாதம்), மிக அதிக அளவில், டில்லி விமான நிலையத்தில் ஒரே சமயத்தில் 7000 கிலோ சிவப்பு சந்தன கட்டைகள் கடத்த முயற்ச்சித்தபோது, பிடிபட்டதாக செய்திகள் தெரிவிக்கின்றன.  இந்த செய்தியில் அக்டோபர் மாதத்தில், இதே கிடந்குள்ள பகுதியில், மேலும் 6700 கிலோ சிவப்பு சந்தன மரம் பிடிபட்டதாகவும் செய்தி வெளியாகி உள்ளது.

கடத்தல்கள் பெரிய அளவில் நடந்தாலும், ஏனோ, கைதாகும் நபர்கள் வெறும் தரகர்களாகவும், கூலிகளாகவும் இருக்கின்றனர். இதுவரை, ஒரு முறை மாத்திரமே ஒரு பெரிய வியாபாரி பிடிபட்டதாக செய்திகள் வந்தது. இப்போது கூட, இரண்டு அதிகாரிகள் கொலை செய்யப்பட்ட பிறகும், ஆந்திர முதல்வர், ஒரு குழுவை நியமிப்பதாகவும், அதிக ஆயுதங்கள் அளிப்பதாகவும் தெரிவித்துள்ளார், ஆனால், தேவைபடுவது ஒரு தீவிர ஆய்வு.

தமிழக எல்லை பகுதியில் இந்த மிகப்பெரிய கடத்தல் நடைபெறுவது நாம் அறிய வேண்டிய ஒரு விஷயமாக, அழிந்து வரும் காடு மற்றும் மூலிகை மரங்களின் தொகையை கவலையோடு நோக்கவேண்டும் என்பது ஒரு புறம் இருக்க, சீனர்கள் இவ்வளவு பகிரங்கமாக இந்த கடத்தலை செய்வதன் காரணத்தை ஆராயவேண்டிய மற்றொரு முக்கிய பொறுப்பும் நமது அரசாங்கத்திற்கு உள்ளது.

இதனோடு, தமிழக அரசாங்கம் மற்றொரு சமூக பிரச்சினையாகவும் இந்த தொடர்ந்து வரும் கடத்தலை நோக்க வேண்டி உள்ளது - இந்த கடத்தலின் மிக அபயாகரமான வேலையாக உள்ள, மரம் வெட்டுதலில் பெரும்பாலும், தமிழகதின் பழங்குடியினர் வசித்து வரும், கல்வராயன் மலை மற்றும் ஜவ்வாது மலை சேர்ந்த மக்கள் ஈடுபட்டுள்ளது.

இங்கிருந்து பலமுறை, கடத்தல்காரர்களால், வாகனங்களில் அழைத்து செல்லப்படும், பழங்குடி மக்கள், காடுகளில் 8 முதல் 10 நாட்கள் தங்கியிருந்து, மரத்தை வெட்டி, அதனை கொண்டுவந்து சில ஊர்களில் சேர்பித்தால், அவர்களுக்கு, ரொக்கமாக, ஒரு கிலோவிற்கு இவ்வளவு என்கின்ற கணக்கில் பணம் பட்டுவாடா செய்யப்படும்.

தங்கள் வாழ்வாதாரம் ஒருபுறம் உலகமயமாக்கலால் அழிக்கப்பட்டு வரும் வேளையில், இந்த பழங்குடியினர் வேறு வேலைகள் தேடி நகரங்களுக்கு குடிபெயர்வது யாரும் ஆச்சிரியமாக பார்க்க வாய்ப்பில்லை. ஆனால், இந்த பழங்குடியினர், தாங்கள் மதிக்கும் ஒரு மரத்தை, சொற்ப காலத்து பண லாபத்திற்காக, மொத்த காட்டையும் அழிக்க முற்பட்டிருப்பதை பார்க்கும்போது, அவர்களை எந்த அளவிற்கு நாம் ஆதரவற்ற நிலைக்கு தள்ளி விட்டோம் என்று உணர முடிகிறது. ஒவ்வொரு முறை இவர்கள் காட்டிற்கு செல்லும்போதும், 200 பேர் வரை திரண்டு செல்கின்றனர். இங்குள்ள  உள்ளூர் கடவுள்களளின்  கோயில்கள் பல ஊர்களில் சமீபமாக புதிய வர்ணங்கள் பூசியும், செப்பனிடப்பட்டும் வருகின்றன, "காப்பாற்ற" லஞ்சம்.

இப்போது இந்த பழங்குடி "கூலி" மக்கள், வனத்துறை காவலர்களை தாக்கவும், கொல்லவும் துணிந்திருப்பது மற்றுமொரு சமூக சீர்கேட்டை சித்தரிக்கின்றது.  இவர்கள் வனத்துறை அதிகாரிகளை தங்கள் எதிரிகளாக பார்க்கின்றார்கள், தாங்கள் 20000 ரூபாய்க்காக கடத்திவரும் 100 கிலோ கட்டை எங்கு  போகின்றது,யாருக்கு இதனால் என்ன பயன் என்று இவர்களுக்கு தெரிய வாய்ப்பில்லை. இந்த கட்டையின் உலக சந்தை விலை குறித்தும் இவர்களுக்கு ஒன்றும் தெரியாது. ஆனால், இவர்கள் தங்கள் உயிரை பணயம் வெய்த்து, இந்த கடத்தல் வேலையில், பலமுறை 10 நாட்கள் வரை நடந்து, சோறு தண்ணி கூட இல்லாமல் கஷ்டப்பட்டு "சம்பாதி"ப்பதாக நினைக்கின்றார்கள்.

சில இடங்களில் வனத்துறை அதிகாரிகளே இவர்களுக்கு உடந்தையாகவும், முக்கியமான கடத்தல் புள்ளிகளாகவும் இருப்பதற்கு வாய்ப்புள்ளது. அத்தகைய தருணத்தில், இந்த பழங்குடியினரின் பரிதாபம் இன்னமும் மோசம், இவர்கள் கஷ்டப்பட்டு காட்டை அழித்துவிட்டு காசும் கிடைக்காமல், உதைவாங்கி, சிலபேர் கை கால் உடைத்துக்கொண்டு வீட்டிற்கு வந்து வெளியே சொல்ல முடியாமல் அமைதியாக மீண்டும் வாழக்கை துவங்கவேண்டிய நிர்பந்தம்.

ஆனால், பெரும்பாலும், இவர்கள் தப்பிவந்து, ஒரு பைக்  வாங்குவதற்காகவோ அல்லது வீடு கட்டு வதற்க்காகவோ இந்த காசை பயன்படுத்த முயற்சிக்கின்றார்கள், இல்லையேல், குடித்து அதையும் வீணாக்கிவிட்டு மீண்டும் வேறெங்கேனும் மொத்தமாக இது போன்ற திருட்டு வேலை கிடைக்குமா என்று யோசிக்க துவங்குவார்கள்.

இவர்களை, வண்டி வைத்து காட்டிற்கு இட்டு செல்பவர்கள் யார்?
இவர்களால் காட்டிலிருந்து கொண்டுவரப்படும் கட்டைகள் எவ்வாறு அங்கிருந்து வெளியே வருகின்றது?
இத்தகைய பெரிய அளவில் கூலி ஆட்களை பகிரங்கமாக நூற்று கணக்கில் எவ்வாறு இவர்களால் ஒரு திருட்டு வேலைக்காக வேலைக்கு அமர்த்த இயல்கிறது?
வன அதிகாரிகளின் செக் போஸ்ட்  கடந்து எவ்வாறு இந்த கட்டைகள் நகரங்களுக்கு வருகின்றன?
இவற்றை சீன தேசத்தவர்கள் நகரங்களில் எங்கு சென்று வாங்குகின்றனர் (அ) அவர்களுக்கு கொடுக்கபடுகின்றது?
இதில் யாருக்கெல்லாம் பங்கு உள்ளது?
இந்த கிண்டங்கிகளை, கட்டைகள் வைத்திருக்க கொடுப்பவர்கள் யார்?அவர்கள், இவ்வளவு பெரிய அளவில் சீனாவிற்கு இந்த கட்டையை கடத்த காரணம் என்ன?
இதுவரை சீன தேசத்து அதிகாரிகளிடம் இதை குறித்து, இந்திய எந்த விதத்திலேயாவது துப்பறிய முயற்சித்துள்ளதா?
உலக சந்தையில் இவ்வளவு விலை  கிடைக்குமானால்,ஏன் இந்த  சந்தனக்கட்டை, அரசாங்கமே, விற்பனை செய்ய கூடாது?


இத்தகைய பல கேள்விகள் நிச்சியமாக எழுப்பபடவேண்டும். ஆனால், இவ்வளவு  நடத்தப்பட்டும் ஒரு கொள்ளையை, ஏனோ,  மத்திய மாநில அரசுகள் உன்னிப்பாக கவனித்து, தீவிரமாக எந்த நடவடிக்கையும் எடுக்கவில்ல என்றே தோன்றுகின்றது. 

References:
1. http://www.ndtv.com/article/south/kiran-reddy-orders-probe-into-murder-of-forest-officials-in-tirupati-459051
2. http://www.ptinews.com/news/4236794_Two-forest-officials-killed-by-red-sander-smugglers.html
3. http://www.thehindu.com/news/national/andhra-pradesh/redsand-smugglers-kill-two-forest-officials-near-tirupati/article5462787.ece
4. http://uae.makeupandbeauty.com/benefits-red-sandalwood-skin/
5. http://www.zitantique.com/about.html
6. http://www.ejfrankel.com/exhibtext.asp?exhibID=52
7. http://www.ebay.com/bhp/zitan
8. http://www.thehindu.com/todays-paper/tp-national/tp-andhrapradesh/china-using-red-sanders-for-atomic-energy/article3720336.ece
9. http://www.business-standard.com/article/pti-stories/red-sanders-seized-from-3-chinese-nationals-113112300684_1.html
10. http://news.xinhuanet.com/english/china/2013-11/18/c_132898346.htm
11. http://articles.timesofindia.indiatimes.com/2013-12-10/delhi/45032876_1_smuggling-customs-wood

***இன்னமும் சரியாக தமிழில் தட்டச்சு செய்ய வரவில்லை, பிழைகளுக்கு மன்னிக்கவும். 

Monday, September 30, 2013

நாளை .விடுமுறை..


தமிழக ஆண்களின் பிரதான வேலையான குடிப்பதற்கு நாளை ஓய்வு. மது பான  நாளை நமது தேசிய தந்தை என்று அழைக்கப்படும் காந்தி அடிகளின் பிறந்த தினத்தை ஒட்டி, மூடி இருக்கும்.  இதன் தாத்பரியம் என்ன என்று விளங்காதவர்களுக்கு - மறந்துவிட்டோம் என்று மகாத்மாவிடம் மன்னிப்பு கேட்கும் பொருட்டு, தொடர்ந்து வரும் அரசாங்கங்கள் பிரகடன படுத்தும் ஒரு நிகழ்வு இது. 

விடுமுறை கடைகளுக்கு தான், குடிப்பதற்கு அல்ல. இன்றே நிறைய வாங்கி நாளை, வீட்டிலேயோ மற்றும் வெளி இடங்களிலேயோ எப்போதும் போல் குடித்து தங்கள் 'குடி உரிமையை' நிலை நாட்ட எந்த தடையும் இல்லை. நிறைய குடித்து செத்து போனாலும் பரவாயில்லை, தயவு செய்து குடித்து விட்டு வாகனம் ஓட்டவேண்டாம்.

Monday, August 12, 2013

தமிழகத்தில் பெருகிவரும் தற்கொலைகள் - யார் காரணம்?


கடந்த  சில மாதங்களாகவே தமிழகத்தில் தினமும் எங்கோ  கோடியில் ஒரு இளைஞர் அல்ல்து இளைஞி தற்கொலை செய்துகொண்டதாக தகவல்கள் வந்த வண்ணம் இருக்கின்றது. இது மிகவும் வேதனைக்குரிய ஒரு நிகழ்வு. இவற்றிற்கு காரணம் என்ன? யாரெல்லாம் இவற்றிற்கு உடந்தை? என்று ஆராய அவசியமாகிறது.

1. தனிமைப்படுதல் - பெரும்பாலான தற்கொலை செய்து கொள்பவர்கள், தங்கள் குடும்பங்களிலும், சமூகங்களிலும், கல்லூரிகளிலும் தனிமையாக தங்களை கருதுவது. அத்தகைய தனிமையில் ஏதோ ஒரு சிறு தோல்வி ஏற்பட்டாலோ, அல்ல்து ஏற்பட்டுவிட்டதாக உணர்ந்தாலோ, அந்த இளைஞன் பேசக்கூட யாரையும் அணுகாமல், தற்கொலைக்கு தள்ளபடுகின்றான். சுய மதிப்பு மற்றும் வாழ்க்கையின் புரிதல் இதில் முக்கிய பங்கு வகிக்கின்றது.

இன்றைய படிப்பு, வேலைவாய்ப்பு, பொருளாதாரம், பெரும்பாலாரை ஆட்டிபடைக்கும் கலாசாரம் மற்றும் அதை சார்ந்த வாழ்க்கை முறை அனைத்தும், மனிதனை தனிமைபடுதுதலை தூண்டும் விதத்தில் அமைந்துள்ளது.

2. பிரிந்து விட்ட குடும்ப உறவுகள், ஒட்டாது பலதும் கேட்க்கும் நட்பு -  தனிமையில் துவழும் மனிதனை கண்டறிந்து, உற்சாகபடுத்தி, வாழ்க்கை நெறிகளை மெல்லமாக நினைவுபடுத்தி, அரவணைத்து செல்வது, நமது சமுதாயத்தில் குடும்பங்களும், உறவின் முறையும், அக்கம்பக்கம்  தொன்றுதொட்டு செய்து வந்துள்ளனர்.  இப்படிப்பட்ட கலாசாரத்தில் வளர்ந்தவர்கள், ஒரு சிறிய சமூகத்தை, அதில் தங்களுக்கு கிடைக்கும் ஆதரவை, சிறுவயதிலிருந்தே பெற்றும், பங்கேற்றும், அளித்தும் வருகின்றார்கள்.

ஆனால், இன்று பொருளாதார முறை, முதலில் குடும்பங்களை பிரிக்கின்றது, பிறகு உறவு முறைகளின் மத்தியில் நாம், நமது அறிவுத்திறனையும், செல்வதையும், செல்வாக்கையும் எவ்வாறெல்லாம் பகட்டு கௌரவத்தை பேணுவதற்காக உபயோகிக்க வேண்டும் என்று நமக்கு கற்பிக்கின்றது. ("மாமனார் / மச்சான் / மாப்பிள்ளை வீட்டுக்கு போகுணும், புதுசு போட்டுகொண்டு / வாங்கிகொண்டு  போகணும், கொஞ்சம் கைமாத்தா வேணும்..." என்று எவ்வளவு பேர் தலைசொரிவத்தை தினம் தினம் பார்கின்றோம்).  இதைக்கண்டு பயந்தே உறவுகளை ஒதுக்கிவிட்டவர்கள் சிலர், பகட்டிற்கு ஒத்துவரவில்லை என்று உறவுகளால் ஒதுக்கப்பட்டவர்கள் பலர். இத்தகைய குடும்பங்களில் உள்ள இளைஞர்களுக்கு, உறவுகளின் பிடிப்போ, சிறிய வயதில் அறியவேண்டிய மாற்றோர்பால் பரிவோ, ஆதரவோ தெரியாமலேயே வளர்ந்து விடுகின்றனர். அதனால், 'எல்லாம் எனேக்கே' அல்லது, 'எல்லாம் என்னிடமிருந்து பிரிக்கப்பட்டது' என்கின்ற மனோபாவம் வளர்கின்றது.

முன்பொரு காலத்தில் நண்பர்கள், உறவுகளின் பங்கை நிரப்பி வந்தனர், ஆனால் இப்போது, நட்புகளும் மிக சொற்ப காலமே மலர முடிகின்றது. எல்லோரும் ஆறு மாதத்திற்கு ஒருமுறை வெவ்வேறு ஊர்களில்  வேலை மாற்றி கொண்டு போகும்போது, நட்பிற்கும், அதனால் ஏற்படக்கூடிய உறவிற்கும் கூட நேரமில்லை. மற்றொரு விதமான நட்பை அதிகம் பார்க்க முடிகின்றது, 'இன்று சேர்ந்து இருக்கின்றோம், இன்று சேர்ந்து கொண்டாடுவோம்,நாளை வேறொருவருடன் கொண்டாடுவோம்' என்னும் போக்கு. இத்தகைய நட்பு வெறும் காசுக்கு உடல்விற்க்கும்  தொழிலைவிட கேவலமானதாகவே தெரிகின்றது.

3. பிரித்து, கொண்டாடி, சீரழிக்கும் கீழ்மக்கள் - சமூக, அரசியல், ஜாதி மற்றும் மதம் போன்ற மக்களை பிரித்து, பாகுபடுத்தி, அந்த சிறிய வட்டத்தில் மனிதனை பெரியவனாக காண்பிபதற்காக, தற்கொலைகள் கொண்டடப்படுவ்து ஒரு முக்கிய காரணமாக தெரிகின்றது.

உணர்ச்சிகளை தூண்டிவிட்டு, என்ன செய்வதென்று அறியாத இளைஞனை, வேறு நல்வழியும் காண்பிக்க தெரியாத, தற்கொலைகளை கொண்டாடி அவன் உயிரில் தங்கள் ப்ராச்சரத்தை செய்து ஊர் முழுவதும் பரப்ப விழையும்  தலைவர்கள், தற்கொலைகளை ஆதரிப்பது ஆச்சிரியமில்லை. மற்றொரு சுயமரிதை அதிகமுள்ள சமூகத்தில் நிச்சியமாக, இவர்கள் சமூகத்திலிருந்து ஒதுக்கபட்டோ அல்லது விரட்டபட்டோ இருப்பர். ஆனால், இந்த பிணம் தின்னி தலைவர்களை தொடர்ந்து தாங்கவேண்டியது தமிழகத்தின் துரதிஷ்டம்.  இன்றும் கூட ஒவ்வொரு தற்கொலையை கூட்டம் போட்டு கொண்டாடும் இந்த தலைவர்கள் எப்போதாவது, இவர்கள்து கூட்டங்களை 'இளைஞர்களுக்கு தன்னம்பிக்கை கூட்டம்' என்றோ, 'தற்கொலை எதிர்ப்போம் முழக்கம்' என்றோ பேசியதாக எங்கும் தெரியவில்லை.

4. தன்னம்பிக்கை வளர்க்கா கல்வி முறை -  இன்றைய கல்வி முறை, மாணவனை தனிமை படுத்தல் மாத்திரமின்றி, அவனை தன்னம்பிக்கை உள்ளவனாக ஆக்குவதில்லை. அப்படி ஆக்கியிருந்தால், நாம் பார்க்கும் தற்கொலைகளில் பெரும்பாலானவை படித்த இளைஞர்களாக ஏன் இருக்கின்றார்கள்? சிறு தோல்விகளை கண்டு மனமுடைந்து செய்வதறியாது, தற்கொலை செய்துகொள்ளும் ஒரு இளைஞனின் படிப்பு எம்மாதிரதிற்க்கு சமம்?

பல கல்வி மையங்களில் 'தன்னம்பிக்கை பயிற்சி' ஏதோ உடல் வளர்க்கும் பானத்தை போல் தனி 'ஸ்பெஷல்' வகுப்புகளில் புகட்டபடுகின்றது (சம்பாதிக்க இன்னொரு யுக்தி). இதைவிட கேவலமான கல்வி வேறென்னவாக இருக்க முடியும்? தன்னம்பிக்கை தான் கல்வியின் வெளிப்பாடாக இருக்கவேண்டுமே தவிர, அதற்க்கு தனியாக இன்னொரு பயிற்சி அளிப்பத்தைவிட இவர்கள் கல்வி அளிப்பத்தை நிறுத்தினாலே போதுமே? வெறும் மதிப்பெண் கொண்டு தன் மதிப்பை, தன உயிரின் மதிப்பை எடைபோடும் எண்ணத்தை உருவாக்கும் ஒரு கல்விமுறை எப்படி கல்வியாகும்?

5.  மறைந்து வரும் மக்கட்பண்பு - நல்ல பண்புகளை, கிண்டல் செய்வதையும், கீழ்த்தரமாக சித்தரிப்பதையும் நமது கலை, முக்கியமாக, எங்கும் வியாபித்துள்ள சினிமா கலை பெரும்பாலான சமயங்களில் செய்வது நாம் அறிந்ததே.  பொறுமை, நிதானம், அமைதி, அன்பு, பரிவு, பகிர்தல், பரோபகாரம், மரியாதை, எதிர்-பாலார் மதிப்பு, அடக்கம், நற்சொற்கள் கொண்ட மொழி பிரயோகம், நேர்மை, கண்ணியம், ஈகை, பணிவு...நமது மொழியில் உயர்ந்த மக்கட்பண்பிர்க்கு எத்தனை வார்த்தைகள் இருந்தும், இன்று இந்த பண்புகள் மாத்திரமின்றி, இந்த சொற்களும் நமது சமூகத்தை விட்டு மறையும் நிலை.

முன்பொரு காலத்தி ஆன்மிக சிந்தனையாளர்கள் இவற்றை சமூகத்தில் புகுத்தி வந்தனர். அவர்களை இழிவுபடுத்தி ஓரம்கட்டியபிறகு, வேறு யார் இந்த வேலையை செய்வார் என்று எவரும் சிந்திக்கவில்லை. இந்த பண்புகள் யாவையும் மற்றவருடன் நாம் நடந்து கொள்ளும் விதத்தை குறிப்பவயாக இருந்தாலும், இவை நாம் நமது வாழ்க்கை அமைத்து கொள்ளவும் உதவியாகவே இருக்கும். நிச்சியமாக 'தற்கொலை' போன்ற சிந்தனைகள் நமது மனதில் எழுவதை தடுக்கும்.

ஆம் மேலுள்ள அனைத்தும் வெறும் பிரச்சனைகள் தான், எங்கும் நான் விடைகளை தரவில்லை. எந்த ஒரு கேள்விக்கும், சுலபமாக விளக்கமோ, விடையோ அளிப்பது மற்றொரு நமது காலத்தின் துரதிஷ்டம். சமூக நிகழ்வுகளுக்கும், மாற்றங்களுக்கும் எளிய விடைகள் இல்லை. உண்மை எளிது, ஆனால் சமூகத்தில் அதனை ஏற்கும் தன்மை மிகவும் கடினம்.

தமிழகத்தில் இப்போதது விரக்தியும், வேதனையும், ஏமாற்றமும், ஏக்கமும், ஏற்க்கமுடியாத முடிவுகளும், ஏமாற்றப்பட்டோம் என்கின்ற உணர்வும், என்ன செய்வது என்று அறியாத நிலையம், கொண்ட பல இளைஞர்கள் மன உளைச்சலில் வாடுவது உண்மை. இதற்க்கு மேற்கண்ட போக்கை தட்டி கேட்காவிட்டாலும் பரவாயில்லை, அவற்றிற்கு நமது வாழ்வில் இடம்  கொடுத்து வாழ்விததுக்கொண்டு இருக்கின்றோம்.

இனி ஒரு விதி செய்வோம் என்று நாம் துவங்குவோமேயனால், முதலில் நாம் செய்ய வேண்டியது -
- நமது பிள்ளைகள பள்ளிக்கூடம் கல்வி மாத்திரமே கல்வி என்னும் தவறான வழியிலிருந்து காப்போம். கல்வி என்பது வள்ளுவன் சொன்னதை போல், அறிவு வளர்ச்சிக்கும், மெய்ப்பொருள் காண்பதற்கும் மாத்திரமே என்பதை சிறு வயதிலிருந்தே உணர்த்தவேண்டும்.
- தன்னம்பிக்கை என்பது, மனிதர்களுக்கு, மனித குலத்திற்கு இன்றியமையாத ஒரு தனித்வம், இதனை சிறுவயதிலேயே அடையவேண்டியது கட்டாயம் என்பதை நாம் முதலில் உணர வேண்டும், பிறகு, அதனை, போதிக்காமல், நமது நடத்தை மூலம் குழந்தைகளுக்கு உணர்த்தவேண்டும். குழந்த்தைக்கு, கொஞ்சுதல் என்ற பெயரால் மரியாதை குறைவாக பேசுவதற்கோ அல்லது, செல்லம் கொடுப்பதாக நினைத்துக்கொண்டு பிறர் புண் படும்விததில் பழக விடுவதோ தவறு என்பதை நாம் உணர்ந்து, அவ்வாறல்லாது குழந்தைகள் முன் நமது நடத்தையை மாற்றுவது முக்யமான பெற்றோர் கடமை
- சக மாணவர்களுக்கு உதவுவதை நிச்சியமாக பெற்றோர வரவேர்க்கவேண்டும்
- மனிதநேயத்தை உணர்த்தும் இடங்களுக்கு குழந்தைகளை அழைத்து செல்வது அவசியம்
- முடிந்தவரை, 10 வயது வரையாவது குழந்தைகளை தொலைகாட்சி பெட்டிக்கு அடிமையாகாமல் பாதுகாக்கவேண்டியது பெற்றோரது கடமையாகும்
- இளைஞர்களை கொஞ்சமாவது உயர்ந்த பண்புகளை பார்க்கவும், கேட்கவும், பயனடையவும் செய்தல் அவசியம். பெரும்பாலான இளைஞர்கள், ஒரு நல்ல கவிதையையோ அல்லது நல்ல இசையையோ, கட்டுரையோ, கதையோ அனுபவித்ததில்லை. ஆதலால் கலை கற்பிக்கவேண்டிய உயர்பண்புகள் வேறெங்கும் கற்கவோ, கிடைத்தால் அனுபவிக்கவோ தெரியாமலேயே வளர்ந்துவிடுகின்றான்.
-  மாணவர்களை தொண்டு செய்ய தூண்டுதல் அவசியம், மற்றவர்க்காக ஒருமுறை தொண்டு செய்து அதன்மூலம் மற்றவர் பெரும் சந்தோஷத்தை ஒரு முறை அனுபவித்தவன், என்றும் தற்கொலை செய்வதை எளிதாக ஏற்கமாட்டான்

தொடர்வேன்...

Thursday, July 11, 2013

எழுதுவதை நிறுத்தவில்லை...

தமிழில், தமிழ்நாட்டை குறித்த எனது பதிவுகளை இந்த இணைதளத்தில்  எழுதுவதை கொஞ்சம் காலமாக நிறுத்தி இருப்பதை இன்று தான் பார்த்தேன். 
தமிழில் எழுதவில்லை என்று அர்த்தமில்லை  முன்பு எப்போதும் இல்லாத அளவில் தமிழில் எழுதிய காலகட்டத்தில் இங்கு எழுதுவதை பதிவு செய்யவில்லைஎன்பதே உண்மை. 

தாளாண்மை பத்திரிகையில் தொடர் கட்டுரையாக சில மாதங்களாக எழுதி வருகின்றேன். சென்ற வருடம் காந்திய சிந்தனை குறித்து மூன்று கட்டுரைகளை எழுதியிருந்தேன். அதற்க்கு பிறகு இந்த வருடம் 4 கட்டுரைகளை எழுதி உள்ளேன்.

இந்த வலை பதிவில் நான் மற்ற இடத்தில் எழுதும் கட்டுரைகளையும் முடிந்தவரை பதிவு செய்ய இனிமேல் முயற்ச்சிக்கிறேன். 

தொடர்ந்து படித்து வரும் நண்பர்களுக்கு நன்றி.

 
Google Groups Subscribe to Chief-Syndicate To Get Updates from this Blog by email
Email:
Browse Archives at groups.google.com